A Mancomunidade Terra de Celanova gaña o primeiro premio dos Coopera Galicia de Entidades Locais 2017

Twittear

Celanova, 17 de abril de 2018.- O vicepresidente da Xunta, Alfonso Rueda, presidiu o pasado venres día 13, a sexta edición dos “Premios Coopera”, que tiveron lugar no Mosteiro de San Clodio (Leiro), e que teñen como obxectivo poñer en valor e recoñecer as iniciativas de colaboración entre os concellos galegos.

Participaron no acto o Presidente da Deputación de Ourense, Manuel Baltar, o alcalde de Leiro, Francisco José Fernández, e o presidente da Fegamp, Alfredo García, xunto cos representantes e persoal das entidades premiadas.

Nesta ocasión, os tres primeiros premios foron para as mancomunidades de Terra de Celanova, a Mariña Lucense e Terras do Avia, respectivamente.

O proxecto premiado desta Mancomunidade contempla a implantación dunha aula de conciliación, que se encargaría da atención para nenos entre os 3 e 17 anos, e de actividades formativas para mulleres, ampliando os servizos ofrecidos polo Centro de Información á Muller. Ofrecendo  ademais unha serie de iniciativas para fomentar a colaboración coas tarefas do fogar.

Recolleu o galardón o Presidente da Mancomunidade Terra de Celanova, José Antonio Pérez Cortés, quen destacou a importancia da cooperación entre concellos e administracións.